Carlo Ancelotti ka folur për mediat pas fitores së Real Madridit ndaj Alavés. Ai u pyet mbi numrin e madh të kartonëve të verdhë që ekipi i tij mori për protesta ndaj arbitrit. Real Madridi kishte 7 faulle dhe 4 kartonë të verdhë, ndërsa Alavés pati 10 faulle pa asnjë karton të verdhë. Ancelotti shprehu mendimin e tij për situatën e krijuar në Bernabeu, duke thënë:
“E përsëris atë që thashë një ditë më parë. Kuti matës i gjyqtarëve ka ndryshuar dhe ne duhet të mësohemi me të. Asgjë tjetër. Nuk jemi mësuar ende me të. Na kanë dhënë 4 kartonë të verdhë për protestë. Duhet t’i shmangim protestat, pikë. Të drejta apo të padrejta, ne duhet të përshtatemi me rregullat e reja.”
Në lidhje me Kylian Mbappé, Ancelotti konfirmoi se ai ishte pak i ngarkuar dhe kishte kërkuar zëvendësim për të shmangur ndonjë problem.
“Një pjesë e parë shumë e mirë, por si e justifikoni ngërçin që patët në 10-15 minutat e fundit?” u pyet Ancelotti.
“Thjesht ky është futbolli. Kur mendoni se ndeshja ka mbaruar, mjafton një gabim i vogël që kundërshtari të shënojë e t’i rritet besimi. Nga ana tjetër, kjo shton mosbesimin tuaj. Kjo ndodh shpesh në futboll. Ne nuk duam që kjo të ndodhë, por ndonjëherë mund të ndodhë. Duhet theksuar se për 60 minuta skuadra ka luajtur shumë, shumë mirë dhe kjo na jep besim.”
Ancelotti u pyet edhe për ankesat e Luis García Plaza mbi një goditje nga Endrick në zonën e Alavés. Ai tha se nuk mund të jepte një mendim pa e parë rastin me video.
“Nuk mund të jap një mendim, se nuk e kam parë rastin me video. Ne kemi dhënë mendimin tonë për këtë çështje pas ndeshjes, por pa asnjë problem, asnjë përballje të ashpër verbale.”
Në lidhje me kartonët e verdhë, ai shpjegoi se i kishte thënë arbitrit se e kishte parë të ekzagjeruar ndarjen e tyre për protesta.
“Më janë dukur të ekzagjeruar kartonët e verdhë për protesta. I thashë se duhet të bëj atë që kam në dorë për t’i penguar lojtarët e mi të protestojnë ndaj arbitrit. Nuk pati probleme, ne kemi biseduar vetëm për këtë.”
Kur u pyet për rolin e Mbappé, ai theksoi përmirësimin e tij dhe të skuadrës.
“Në sulm po bëjmë shumë mirë. Për një orë, skuadra luajti shumë mirë, duke kërkuar mundësi në mënyra të ndryshme, me tranzicione dhe pasime filtruese. Edhe Mbappé, edhe skuadra po përmirësohen bashkë. Kalendari është shumë kërkues, e diela do të jetë gjithashtu shumë impenjative.”
Ancelotti përfundoi duke komentuar mbi kartonin e verdhë të Modric, duke thënë se është e vështirë të përgjigjesh për të.
“Nëse kapitenit i është dhënë një karton i verdhë pse ka folur, vetëm njëri mund të përgjigjet, që është arbitri.”
Për sa i përket Jude Bellingham, Ancelotti e vlerësoi performancën e tij.
“Bellingham po rritet, asistoi Mbappé dhe luajti një ndeshje shumë të kompletuar. Duhet të mësohet pak më shumë me zonën, si sezonin e kaluar. Është më e komplikuar kundër një ekipi me një bllok të ulët si Alavés.” /Telesport.al/
