Këto ditë në Frankfurt të Gjermanisë po mbahet panairi më i madh i librit në botë. Në mesin e 7 500 ekspozuesve, edhe këtë vit e pranishme ishte Kosova.
Edon Zeneli nga Shoqata e Botuesve e Kosovës ka theksuar se janë mbi 20 botues nga Kosova dhe Shqipëria, botimet e të cilëve paraqiten këtu, qoftë ata botues privatë, botime të institucioneve publike.
“Kemi të pranishëm më shumë se dhjetë shkrimtarë nga Kosova dhe Shqipëria dhe nga diaspora që prezantojnë botimet e tyre këtu”, ka deklaruar ai për RTK.
Gjatë ditëve të panairit u mbajtën edhe disa promovime librash nga shkrimtarët nga Kosova dhe Shqipëria, por edhe nga ata që jetojnë në diasporë.
Në mesin e tyre ishte Dorina Hoxha nga Tirana për ta promovuar librin e saj të fundit “Një zarf i vonuar nga Marburgu”, e cila për librin bëri me dije se “prek fenomenet aktuale të kohës, dashurinë në distancë, zhvillimin teknologjik dhe në fund përfundon me një dramë”.
E ftuar nderi në këtë edicion të panairit kësaj radhe ishte Italia, e cila paraqiti traditën letrare. /RTKlive
