Anonim në Serie C, gjigant në Champions League. Jeta është e çuditshme, por e bukur për Francesco Camarda-n, i cili dje bëri histori duke u bërë futbollisti më i ri italian që luan në Champions League dhe nëse nuk do të kishte qenë për VAR-in, i cili ia anuloi golin e tij për një pozicion milimetrik jashtë loje, ai do të ishte bërë gjithashtu golashënuesi më i ri.
Së bashku me talentet e tjera si Liberali dhe tepricat si Ballo Toure, Camarda luan në Serie C me Milan Futuro, por deri më tani ai nuk ka pasur shumë fat. Vetëm një gol është merita e tij, shumë raste të humbura dhe disa zëvendësime, por Milan-i ka besim tek ai.
Dje me Club Brugge hyri në vend të Morata-s në minutën e 75-të dhe me 16 vjet e 226 ditë (i lindur më 10 mars 2008) mposhti rekordin e mëparshëm, të cilin e mbante Moise Kean, i cili debutoi në moshën 16 vjeçare e 267 ditë me Juventus-in në 2016. Një rekord i ri për të duke qenë se ai është gjithashtu lojtari më i ri që ka luajtur ndonjëherë në Serie A (15 vjet e 260 ditë kur bëri debutimin e tij më 25 nëntor 2023 kundër Fiorentina-s).
Menjëherë pas hyrjes së tij në fushë mbrëmë, në minutën e 88-të, talenti i Milan-it shënoi me kokë, por gjyqtari gjerman Zwayer e anuloi atë për shkak të një pozicioni jashtë loje.
Camarda ka rrëfyer emocionin e tij për “Sky”: “Rekordi më jep shumë krenari, jam i sinqertë. Dhe kjo më shtyn të jap më shumë për të përmirësuar veten dhe për të bërë netë të tilla të ndodhin më shpesh”.
“Ishte emocioni më i mirë i jetës sime, më pas VAR-i… Jam shumë i zhgënjyer, por këto gjëra ndodhin, veçanërisht në futboll tani”.
“Unë dua të bëj më shumë. Është dita më e mirë e jetës sime sportive, nuk gjej fjalë për ta përshkruar. Këto janë netë që i keni ëndërruar që në fëmijëri. Gjithashtu jap gjithçka për Milan Futuro dhe Ligën e të Rinjve”, theksoi ai.
Çfarë ndryshon nga sot për të?
Ai me siguri do të ketë mundësi të tjera. Fonseca shpjegoi se si synon ta menaxhojë tani: “Unë, Bonera dhe Guidi bëjmë çmos për t’i ndihmuar të rinjtë të rriten. Ne kemi Morata-n, kemi Abraham-in dhe Jovic-in, bëhet pak e vështirë për Camarda-n të luajë. Dhe në këtë moshë është e rëndësishme të luash”.
“Ajo që ne bëjmë është të përpiqemi t’i japim atij më shumë hapësirë për t’u përmirësuar, midis Primavera, Milan Futuro dhe Ekipit të Parë”.
“Ndonjëherë është më e vështirë të luash në Serie C sesa në Serie A dhe anasjelltas. Kur stërvitet me ne, bën shumë mirë. Sot ai punoi mirë për ekipin, me guxim në vijën e pasimeve. Ai nuk duket si një djalë i moshës që është kur luan”, shtoi portugezi. /Albanianpost.com
