Maratona e Stambollit, e vetmja në botë që kalon nga Azia në Evropë përmes Bosforit, do të zhvillohet këtë të diel.
Vrapuesit do të fillojnë garën nga ura e dëshmorëve të 15 korrikut dhe do të kalojnë përmes disa monumenteve historike të qytetit, duke përfshirë Pallatin Dolmabahçe, Urën e Galatas, Xhaminë e Re, Pazarin e Erëzave, Stacionin e Trenit Sirkeci, Pallatin Topkapi dhe Parkun Gulhane, duke përshkuar një distancë prej 42 kilometrash.
Pjesëmarrësit, që pritet të tejkalojnë 40,000, përfshijnë më shumë se 14,000 gra, duke thyer kështu rekord për numrin e pjesëmarrëseve femra.
Garën e kaluar, Panuel Mkungo nga Kenia fitoi kategorinë e meshkujve me kohën 2 orë, 10 minuta e 35 sekonda, ndërsa Beatrice Cheptoo, gjithashtu nga Kenia, kaloi vijën e finishit për 2 orë, 27 minuta e 9 sekonda.
Historia e Maratonës së Stambollit
Ideja e vrapimit nga Azia në Evropë u përmend për herë të parë nga Gazeta Tercuman pas ndërtimit të urës së Bosforit në vitin 1973 dhe u realizua më 1 prill 1979, përmes iniciativës së një grupi turistësh gjermanë. Vrapuesit e parë ishin nga Gjermania, Belgjika, Holanda dhe Turqia, dhe organizimi u bë nga Federata e Atletikës si pjesë e “Maratonës Ndërkombëtare Azi-Evropë”.
Maratona u transferua nën organizimin e Bashkisë Metropolitane të Stambollit në vitin 1982 dhe më pas mori emrin “Maratona Ndërkontinentale e Eurasia”. Në vitin 2012, kjo ngjarje u pranua në Kategorinë e Artë nga IAAF, dhe një vit më vonë mori emrin aktual “Maratona e Stambollit”.
Këtë vit, maratona ka marrë gjithashtu “Etiketën e Artë” nga World Athletics, që tregon se ka arritur standarde të larta organizative. Ngjarja premton të jetë një festë e vërtetë sportive, duke bashkuar vrapues dhe tifozë nga e gjithë bota. /Euronews.al/
