Dan Caine mund të mos ketë qenë në radarin e Washington-it para mbrëmjes të së premtes.
Gjenerali i pensionuar me tre yje ishte zgjedhja befasuese e presidentit amerikan Donald Trump për t’u bërë kryetari i ardhshëm i Shefave të Përbashkët të Shtabit.
Kjo zgjedhje duket se na kthen pas në takimin e tyre të parë në Irak në vitin 2018.
Caine, asokohe zëvendës komandanti i një task force të operacioneve speciale që luftonte Shtetin Islamik, i tha presidentit se grupi militant mund të shkatërrohej brenda vetëm një jave, kujtoi Trump gjatë një fjalimi në Konferencën e Veprimit Politik Konservator në 2019.
Që atëherë, ai e ka ritreguar historinë se si u takua me “Razin” Caine shumë herë – dhe lavdërimet u përhapën më tej.
“Ai është një gjeneral i vërtetë, jo një gjeneral televiziv”, tha Trump në Miami të mërkurën, dy ditë përpara se postimi i tij në “Truth Social” ta katapultonte Caine nga pensionimi në një emërim për të qenë oficeri më i lartë në detyrë aktive në ushtrinë amerikane.
Nëse miratohet nga Senati, Caine do të marrë përsipër një ushtri që po lëkundet nga ndryshimi në 30 ditët e para të administratës Trump dhe do të trashëgojë një Shtab të Përbashkët të tronditur nga shkarkimi i befasishëm i gjeneralit të Forcave Ajrore C.Q. Brown.
Caine, një pilot F-16 në pension, do të promovohet në gjeneral me katër yje dhe më pas duhet t’i nënshtrohet një procesi potencialisht rraskapitës të konfirmimit në Senat për të marrë një mandat katërvjeçar si kreu i uniformuar i ushtrisë së vendit.
Karriera ushtarake e Caine-it është shumë larg rrugës tradicionale për t’u bërë këshilltari kryesor ushtarak i presidentit.
Gjeneralët dhe admiralët e mëparshëm kanë udhëhequr një komandë luftarake ose një degë ushtarake shërbimi.
Caine nuk u ngrit aq lart në gradë përpara daljes në pension.
Në fillim të këtij viti Caine përshkroi në një podcast se si si i ri donte të ndiqte gjurmët e babait të tij, një pilot luftarak.
Ai u diplomua në vitin 1990 në Institutin Ushtarak të Virginia-s me një diplomë bachelor në Arte dhe Ekonomi.
Caine, i cili fluturoi më shumë se 2 mijë e 800 orë në F-16, ishte një nga pilotët e ngarkuar me mbrojtjen e Washington-it më 11 shtator 2001, kur rrëmbyesit e Al Qaeda-s përplasën avionët komercialë në Pentagon dhe Qendrën Botërore të Tregtisë në New York.
Caine mbajti një sërë postesh në kryeqytet që nga viti 2005.
Ai ishte asistent i posaçëm i sekretarit në Departamentin e Bujqësisë dhe më pas drejtor i politikave për antiterrorizmin në këshillin e sigurisë së vendit të Shtëpisë së Bardhë.
Sipas biografisë së tij zyrtare të Forcave Ajrore, Caine ishte një anëtar me kohë të pjesshme i Gardës Kombëtare dhe “një sipërmarrës dhe investitor serial” nga viti 2009 deri në 2016.
Ai ishte së fundmi drejtor i asociuar për çështjet ushtarake në Agjencinë Qendrore të Inteligjencës (CIA), përpara se të pensionohej në fund të vitit të kaluar. /Reuters/Albanianpost.com/
