Gjigandët kinezë të shitjes me pakicë online, Shein dhe Temu, kanë paralajmëruar klientët në SHBA se çmimet e mallrave do të rriten që nga java e ardhshme, pas vendosjes së tarifave të larta nga Presidenti Donald Trump për mallrat që vijnë nga Kina.
Në deklarata pothuajse identike, kompanitë rivale thanë se kanë parë rritje të shpenzimeve operacionale “për shkak të ndryshimeve të fundit në rregullat e tregtisë globale dhe tarifat”, duke shtuar se do të bëjnë “ndryshime çmimesh” duke filluar nga data 25 prill.
Faqet e blerjeve kanë tërhequr dhjetëra miliona konsumatorë në SHBA, tërhequr nga çmimet jashtëzakonisht të ulëta, shkruan BBC News.
Popullariteti i tyre ka vënë në presion Amazon-in, duke e shtyrë të nisë një platformë të re të quajtur Haul në nëntor të vitit të kaluar, që ofron artikuj nën 20 dollarë.
Që nga kthimi në Shtëpinë e Bardhë në janar, Trump ka vendosur taksa deri në 145% për importet nga Kina. Administrata e tij tha këtë javë se, kur tarifat e reja shtohen atyre ekzistuese, detyrimet doganore për disa mallra kineze mund të arrijnë deri në 245%.
Trump gjithashtu ka bërë një përjashtim nga taksat për mallrat me vlerë më pak se 800 dollarë, i cili ndihmoi Shein dhe Temu të depërtonin shpejt në tregun amerikan.
Ligjvënësit amerikanë nga të dyja palët kanë shprehur shqetësime mbi mënyrën se si këto kompani kanë “shfrytëzuar” këtë dispozitë.
Sipas autoriteteve doganore amerikane, rreth 1.4 miliardë paketa kanë hyrë në SHBA nën këtë rregull vitin e kaluar, nga vetëm 140 milionë në vitin 2013.
Që kur Trump filloi të vendosë tarifat, Shein dhe Temu kanë parë një rënie të ndjeshme në renditjen e aplikacioneve të tyre.
Temu aktualisht renditet si aplikacioni i 75-të më i shkarkuar falas në Apple Store në SHBA, pasi më parë ka qenë vazhdimisht në pesë vendet e para në dy vitet e fundit. Shein është në vendin e 58-të, nga vendi i 15-të muajin e kaluar.
Megjithatë, aplikacione të tjera kineze të shitjes me pakicë vazhdojnë të renditen lart në SHBA, përfshirë DHgate në vendin e dytë dhe Taobao të Alibaba në vendin e shtatë.
Shein dhe Temu gjithashtu kanë ulur ndjeshëm shpenzimet për reklama në SHBA.
Temu ka “fikur të gjitha reklamat e tyre në Google Shopping në SHBA” që nga 9 prilli, tha Mike Ryan, drejtues i analizave të tregtisë elektronike në agjencinë e reklamimit online Smarter Ecommerce, në LinkedIn.
Shpenzimi mesatar ditor i Temu për reklama në rrjetet sociale si Facebook, Instagram dhe YouTube ra me 31% në dy javët që çuan deri më 13 prill, krahasuar me muajin e kaluar.
Shpenzimi mesatar ditor i Shein për reklama në SHBA ra me 19% gjatë të njëjtës periudhë, sipas të dhënave nga firma e inteligjencës së tregut Sensor Tower.
Në deklaratat e tyre, Temu dhe Shein inkurajuan klientët të bëjnë blerje përpara se të hyjnë në fuqi çmimet e reja më të larta.
“Jemi të përgatitur të sigurojmë që porositë tuaja të mbërrijnë pa probleme gjatë kësaj periudhe. Po bëjmë gjithçka që mundemi për të mbajtur çmimet sa më të ulëta dhe për të minimizuar ndikimin për ju. Ekipi ynë po punon shumë për të përmirësuar përvojën tuaj të blerjes”, thuhej në deklarata.
Temu dhe Shein nuk iu përgjigjën menjëherë kërkesave për koment nga BBC. /KosovaPress/
