Papa Françesku ka vdekur në moshën 88-vjeçare, pas 12 vitesh në krye të Kishës Katolike Romake.
Vdekja e tij vuri në lëvizje procesin shekullor të zgjedhjes së një Pape të ri.
Papa është kreu i Kishës Katolike. Katolikët romakë besojnë se ai është një lidhje e drejtpërdrejtë me Jezu Krishtin.
Ai konsiderohet pasardhësi i gjallë i Shën Pjetrit, i cili ishte i pari nga dishepujt e Krishtit, apostujt.
Si i tillë, ai ka autoritet të plotë dhe të pakufizuar mbi të gjithë Kishën Katolike dhe është një burim i rëndësishëm autoriteti për rreth 1.4 miliardë katolikë në botë.
Megjithëse shumë katolikë shpesh i drejtohen Biblës për udhëzim shpirtëror, ata gjithashtu mund të mbështeten në mësimet e Papës, të cilat formësojnë besimet dhe praktikat brenda Kishës.
Rreth gjysma e të gjithë të krishterëve në botë janë katolikë romakë. Konfesionet e tjera të krishtera, duke përfshirë protestantët dhe ortodoksë lindorë, nuk e njohin autoritetin e Papës.
Papa jeton në Vatikan, shteti më i vogël i pavarur në botë, i cili është i rrethuar nga kryeqyteti italian, Roma.
Papa nuk merr rrogë, por të gjitha shpenzimet e udhëtimit dhe të jetesës mbulohen nga buxheti i Vatikanit.
Kush e zgjedh Papën e ri?
Papa i ri zgjidhet nga organi më i lartë i zyrtarëve të Kishës Katolike, i njohur si Kolegji i Kardinalëve.
Të gjithë janë meshkuj, të emëruar drejtpërdrejt nga Papa dhe zakonisht shugurohen peshkopë.
Kisha Katolike aktualisht ka 252 kardinalë, 138 prej të cilëve kanë të drejtën e votës në zgjedhjen e Papës së ri.
Pjesa tjetër janë mbi 80 vjeç dhe nuk mund të votojnë, por mund të marrin pjesë në diskutime se kush duhet të zgjidhet.
Si zgjidhet Papa dhe çfarë është një konklavë?
Kur Papa vdes (ose jep dorëheqjen, siç bëri Benedikti XVI në 2013), kardinalët mblidhen në një takim në Vatikan, pasuar nga një konklavë, siç quhen vetë zgjedhjet.
Gjatë periudhës ndërmjet vdekjes së Papës dhe zgjedhjes së pasuesit të tij, Kisha drejtohet nga Kolegji i Kardinalëve.
Zgjedhjet zhvillohen në fshehtësi të plotë brenda Sistine Chapel.
Kardinalët individualë votojnë për kandidatin e tyre derisa dikush të marrë shumicën e kërkuar, gjë që mund të zgjasë disa ditë.
Në shekujt e kaluar, votimi ka marrë javë apo edhe muaj dhe disa kardinalë kanë vdekur gjatë konklavës.
E vetmja shenjë e procesit zgjedhor vjen në formën e tymit që del nga oxhaku dy herë në ditë pasi digjen fletët e votimit.
Tymi i zi do të thotë se zgjedhjet kanë dështuar. Tymi i bardhë tregon se një Papë i ri është zgjedhur.
Si shpallet Papa i ri?
Pasi shfaqet tymi i bardhë, Papa i ri zakonisht del brenda një ore në ballkonin me pamje nga sheshi i Shën Pjetrit.
Kardinali më i vjetër që merr pjesë në konklavë më pas shpall vendimin me fjalët Habemus Papam, që është latinisht për “Ne kemi një Papë”.
Më pas ai shpall emrin e Papës së re, pra emrin që ka zgjedhur për pontifikatin e tij, që mund të mos jetë emri i tij origjinal.
Për shembull, Papa Françesku lindi si Jorge Mario Bergoglio, por mori një emër të ri për papatin e tij për nder të Shën Françeskut të Asizit.
Kush mund të bëhet Papë?
Teorikisht, çdo mashkull katolik romak i pagëzuar mund të zgjidhet Papë.
Sidoqoftë, në praktikë, kardinalët pothuajse gjithmonë zgjedhin një të tyrin.
Kur Papa Françesku, i lindur në Argjentinë, u zgjodh në konklavën e mëparshme në 2013, ai u bë kreu i parë i Kishës Katolike nga Amerika e Jugut, një rajon që përbën rreth 28% të katolikëve në botë.
Por historia tregon se kardinalët kanë zgjedhur shumë më shpesh një Papë nga Evropa, veçanërisht nga Italia.
Nga 266 papët e zgjedhur deri më sot, 217 kanë ardhur nga Italia. /Telegrafi/
