Dikur, me vetëm 1euro në xhep, mund të uleshe në një kafene, të porositje një kafe të ngrohtë dhe të shijoje një moment qetësie. Por nga 1 maji, kjo rutinë e thjeshtë pritet të marrë një kthesë më të nxehtë, çmimi i kafesë pritet të kushtojë 1euro e 50 cent, shkak ky zingjiror nga vendimi i ZRrE për rritjen e çmimit të energjisë elektrike.
“Nuk është hera e parë që po shtrenjtohet rryma me këtë qeveri edhe qetash bajagi është një tarifë kogja e nalt. Tek ne bizneset ka me ndiku ma shume ka mundësi që disa edhe do të shuhen se nuk munden me përballu. Rritja e çmimit të energjisë sigurisht që do të reflektoj edhe në rritjen e çmimeve të mënyve tona. Psh, kafeja nga 1euro tek ne do të shtrenjtohet në 1.50 cent”., tha për rtv21 Naim Llapashtica, menaxher i një kafiterie
Vendimi për shtrenjtimin e energjisë elektrike është duke u kundërshtuar në masë të madhe tash e pothuajse tre muaj nga qytetarët, bizneset, organizata joqeveritare si dhe nga vet presidentja e vendit, Vjosa Osmani. Madje në shenjë pakënaqësie u organizuan edhe tri protesta, të cilat po vazhdojnë të hasin në vesh të shurdhër.
Por megjithatë grupi “Asnjë cent m shumë” nuk do të ndalet në ngritjen e zërit kundër këtij vendimi, madje Besnik Shabiu rithekson se do të dorëzojnë padi ndaj ZRrE-së porsa ZRRE-ja të bëjë publik vendimin për shtrenjtimin e energjisë elektrike.
“Protestat nuk do të ndalen deri të shfuqizohet vendimi i ZRrE-së për rritjen e çmimit të energjisë elektrike pasi i njëjti është marrë në mënyrë aspak legjitime nga bord ii ZRrE-së. Dita e shtunë ose dita e premte janë dy alternativa në të cilën pritet të mbahet sërisht protesta. Ne vetëm po presim kur ZRrE po e bënë publik vendimin edhe menjëherë do të ngrisim padi”., tha Shabiu.
Por ajo që mbeti e heshtur karrshi vendimit të ZRrE-së për shtrenjtimin e energjisë elektrike është Qeveria në detyrë. Ish ministri i financave, Haki Shatri, hedh akuza të forta ndaj saj duke e cilësuar se vet kjo qeveri ka sjell këtë gjendje.
“Kanë bo mirë që skanë fol sepse vet janë shkaktar të kësaj situate edhe skanë qka me fol mo pasi vet e kanë pru punën që na me ble energji. Sikur të ishte kohë fushate besoj se zëri i qeverisë në detyrë do të ndihej karrshi kësaj situate, por tash skanë nevoj më për votën e qytetarëve”,tha Shatri.
Kërkesa për shtrenjtimin e energjisë elektrike fillimisht kishte nisur nga muaji shkurt, prej kur kompanitë për shpërndarje dhe furnizim me rrymë KOST, KEDS dhe KESCO dërguan në Zyrën e Rregullatorit për Energji një kërkesë për ndryshim të tarifave. Kjo gjë nisi të bëhej edhe më serioze kur kjo e fundit vlerësoi këtë kërkesë dhe tha se parashikon një rritje mesatare të tarifave për rreth 16%./RTV21/21Media
