Pesë raste të dhunës në familje janë regjistruar dy ditëve të fundit në pesë qytete të ndryshme të Kosovës.
Sipas raportit policor, në të pestat raste, viktimë e dhunës në familje, janë gratë.
Në Drenas, më 2 maj, një grua ka njoftuar forcat e rendit se ishte sulmuar fizikisht nga bashkëshorti i saj.
Viktima ka pranuar tretman mjekësor, ndërsa i dyshuari është arrestuar dhe pas intervistimit me vendim të prokurorit është dërguar në mbajtje.
Rasti tjetër ka ndodhur në Prishtinë gjatë ditës së djeshme.
Një grua ka raportuar se bashkëshorti i saj e ka sulmuar fizikisht dhe i ka marrë 300 euro para. I dyshuari gjendet në arrati. Rasti është duke u hetuar nga njësitë relevante.
Edhe një grua në Gjakovë ka qenë pre e sulmit fizik nga burri i saj.
Sipas policisë, i dyshuari është arrestuar dhe pas intervistimit me vendim të prokurorit është liruar në procedurë të rregullt.
Ndërkaq, në Rahovec është arrestuar një person pasi i njëjti ka sulmuari fizikisht një grua. I dyshuari ishte nën ndikim të alkoolit dhe me vendim të prokurorit është dërguar në mbajtje.
Në Mitrovicën e Veriut raportohet se është arrestuar i dyshuari mashkull kosovar, pasi që ka shkuar në vendin e punës të ish bashkëshortes së tij dhe e ka sulmuar atë dhe një koleg të saj.
Viktimat kanë pranuar tretman mjekësor.
Me vendim të prokurorit, i dyshuari është dërguar në mbajtje.
/Kallxo.com/
