Një zgjidhje e zgjuar për promovimin e Modelit të ri Y. Nuk do ta dëgjoni kurrë Tesla-n ta quajë Cybertruck një dështim, por sipas parashikimeve të vetë kompanisë, kjo është pikërisht ajo që duket.
Në një moment, u pretendua se kishte gati dy milionë rezervime për kamionçinën elektrike. Megjithatë, deri në mars, Tesla kishte prodhuar dhe shitur vetëm rreth 46,000 njësi, transmeton Telegrafi.
Plani fillestar i kompanisë ishte të prodhonte 250,000 automjete në vit, dhe Elon Musk madje sugjeroi që kompania të mund të shiste deri në 500,000 në vit.
Megjithatë, duket se Tesla ka gjetur një mënyrë të zgjuar për të përdorur ato Cybertrucks që nuk mund t’i shesë.
Në fillim të kësaj jave, një kolonë Cybertrucks u pa duke lëvizur nëpër Temple, Teksas, dhe një në veçanti u dallua.
Ai po tërhiqte një rimorkio me një Tesla Model Y të kuq në një kornizë qelqi, me një mesazh të shënuar qartë se SUV-i i ri ishte prodhuar në Teksas.
Kohët e vështira kërkojnë masa të pazakonta, ndaj duket se Tesla dëshiron që sa më shumë njerëz të shohin modelin e ri Y live.
Cybertruck që tërheq Modelin e ri Y është në fakt një dredhi mjaft e zgjuar marketingu, shkruan CarScoops.
Shumë prodhues makinash shpenzojnë shuma të mëdha parash duke marrë me qira hapësira reklamuese përgjatë autostradave, por Tesla gjithmonë i është shmangur fushatave klasike të marketingut.
Në këtë rast, ata në fakt po tërheqin një billbord gjigant, por në vend të fotografisë klasike të një automjeti në të, ka një makinë të vërtetë në rimorkio.
Modeli Y në fjalë është lyer në nuancën “Ultra Red”, që sipas shumëkujt është ngjyra më e mirë që ofron aktualisht Tesla.
A do t’i bindë banorët e Teksasit që të blejnë një veturë të re Tesla pamja e një modeli Y Juniper të kuq? Askush nuk e di, por sigurisht që tërheq vëmendjen. Tashmë në rrjetet sociale janë shfaqur postime, të cilat janë raportuar nga shumë media.
Kjo është më shumë sesa mund të thuhet për shumicën e tabelave statike nga prodhuesit tradicionalë të automjeteve, dhe përshtatet në mënyrë të përkryer me prirjen e gjatë të Tesla-s për marketing jokonvencional. /Telegrafi/
