Njësia për Hetimin e Krimeve Ekonomike, në bashkëpunim me Inspektoratin Farmaceutik dhe institucionet e sigurisë, ka sekuestruar 860 flakona të substancës botox, të kontrabanduara në Kosovë.
Ministria e Shëndetësisë ka konfirmuar se produktet janë konfiskuar në koordinim me Policinë e Kosovës, ndërsa një shtetas turk, i dyshuar për këtë rast, është ndaluar nga autoritetet.
“Ministria e Shëndetësisë do të vazhdojë inspektimet dhe bashkëpunimin me institucionet e sigurisë për të parandaluar raste të tilla”, thuhet në njoftimin zyrtar.
Kontrabandimi i produkteve farmaceutike paraqet rrezik për shëndetin publik, ndërsa autoritetet kanë theksuar se do të jenë të pakompromis në luftën kundër tregtisë ilegale të barnave dhe produkteve mjekësore./Telegrafi/
