Partia Liberale e Mark Carney ka fituar zgjedhjet në Kanada – duke përfunduar një kthesë mahnitëse të fatit të nxitur nga kërcënimet e aneksimit dhe lufta tregtare e Donald Trump.
Pas mbylljes së qendrave të votimit, Liberalët parashikohej të fitonin më shumë nga 343 vendet e parlamentit sesa Partia Konservatore, transmeton Telegrafi.
Megjithatë, nuk ishte menjëherë e qartë nëse ata do të fitonin një shumicë të plotë apo do të duhej të mbështeteshin në një ose më shumë parti më të vogla për të formuar një qeveri dhe për të miratuar legjislacionin.
Duke folur pas rezultatit, Carney tha: “Presidenti Trump po përpiqet të na shkatërrojë në mënyrë që Amerika të na zotërojë – kjo nuk do të ndodhë kurrë, kurrë”.
“Ne do të luftojmë me gjithçka që kemi për të marrë marrëveshjen më të mirë për Kanadanë”, shtoi Carney.
Liberalët dukeshin të drejtuar drejt një humbjeje dërrmuese derisa presidenti amerikan filloi të sulmonte ekonominë e Kanadasë dhe të kërcënonte sovranitetin e saj, duke sugjeruar se ajo duhet të bëhet shteti i 51-të.
Veprimet e Trump i zemëruan kanadezët dhe nxitën një rritje të nacionalizmit, që i ndihmoi Liberalët të ndryshonin narrativën zgjedhore dhe të fitonin një mandat të katërt radhazi në pushtet.
Udhëheqësi i Partisë Konservatore, Pierre Poilievre, shpresonte t’i bënte zgjedhjet një referendum mbi ish-kryeministrin Justin Trudeau, popullariteti i të cilit ra drejt fundit të dekadës së tij në pushtet, ndërsa çmimet e ushqimeve dhe të banesave u rritën.
Carney mori detyrën e kryeministrit pasi Trudeau dha dorëheqjen në fillim të këtij viti.
Zgjedhjet fillimisht dukeshin si një garë e qartë për konservatorët e opozitës, të cilët gëzonin një epërsi dyshifrore ndaj liberalëve përpara se Trudeau të jepte dorëheqje, dhe një ndërhyrje nga Trump çoi në një rritje të mbështetjes për partinë e zotit Carney.
“Amerika dëshiron tokën tonë, ujin tonë, burimet tona. Ne duhet ta pranojmë realitetin se bota jonë ka ndryshuar rrënjësisht “, tha ai pas rezultatit.
Trump ka bërë thirrje të përsëritura që Kanadaja të bëhet shteti i 51-të i SHBA-së që kur u zgjodh president për herë të dytë, dhe ka vendosur tarifa gjithëpërfshirëse ndaj Kanadasë.
Carney është zotuar të ndjekë një qasje më të ashpër me Uashingtonin në lidhje me tarifat e tij, dhe ka thënë se Kanadaja do të duhet të shpenzojë miliarda për të zvogëluar varësinë e saj nga SHBA-ja.
“Ne mund t’i japim vetes shumë më tepër sesa amerikanët mund të na marrin ndonjëherë”, tha Carney natën e zgjedhjeve.
“Ditët dhe muajt në vijim do të jenë sfiduese dhe do të kërkojnë disa sakrifica, por ne do t’i ndajmë këto sakrifica duke mbështetur punëtorët dhe bizneset tona”, shtoi ai.
Nëse partia e Carney kap vetëm një pakicë të 343 vendeve të Dhomës së Përfaqësuesve, ai do të detyrohet të negociojë me partitë e tjera për të qëndruar në pushtet.
Qeveri të tilla minoritare rrallë zgjasin më shumë se dy vjet e gjysmë në Kanada.
Kanadezët shkuan në votime pasi 11 persona u vranë në një sulm vdekjeprurës në një panair rrugor në Vankuver gjatë fundjavës, që çoi në pezullimin e fushatës për disa orë.
Policia ka përjashtuar terrorizmin dhe tha se i dyshuari është një burrë vendas me një histori problemesh të shëndetit mendor.
Carney më parë drejtoi bankën qendrore të Kanadasë dhe më vonë u bë jo-britanik i parë që u bë guvernator i Bankës së Anglisë. /Telegrafi/
