Rruga në drejtim të shkollës fillore ‘’Bajram Sadriu’’ në fshatin Berjah nuk ka asnjë shenjë që tregon se sa duhet të jetë shpejtësia e lejuar për automjete. Kjo po u sjell telashe të shumta banorëve këtu e sidomos nxënësve. Ata thonë që ndihen të rrezikuar, por shqetësimi më i madh janë fëmijët, pasi që u duhet të ecin cdo ditë për gjatë kësaj rruge për të shkuar në shkollë.
Lidhur me këtë shqetësim të banorëve ne kemi kontaktuar udhëheqësin e sektorit për transport dhe trafik në Komunën e Gjakovës, Lekë Sina, i cili përmes një shkrese është përgjigjur kështu.
“Sa i përket rrugës pranë shkollës fillore ‘’Bajram Sadriu’’ në fshatin Berjah, kemi pranuar raportime dhe ankesa nga stafi menaxhues i shkollës. Konsiderojmë se rruga pranë shkollës ka nevojë për mas preventive të cilat parandalojnë aksidentet përkatësisht detyrojnë drejtuesit e automjeteve që të ulin shpejtësinë. Ju njoftoj se që nga shtatori i vitit 2021, komuna e Gjakovës nuk ka kontratë për furnizim dhe mirëmbajtje të sinjalizimit rrugor, në momentin që do të kemi kontratë për kryerjen e shërbimeve të tilla do të intervenojmë në këtë rrugë.”
Banorët këtu mbesin me shpresën që kjo rrugë sa më shpejt të ketë shenjat e trafikut pasi që jeta e tyre e sidomos e fëmijeve po rrezikohet cdo ditë.
