Stufat me gaz vrasin 40,000 evropianë çdo vit duke pompuar ndotës në mushkëritë e tyre, ka gjetur një raport.
Ky është një numër vdekjesh dy herë më i lartë se ai nga aksidentet në komunikacion, raporton The Guardian.
Stufat nxjerrin gazra të dëmshëm të lidhur me sëmundjet e zemrës dhe mushkërive, por ekspertët paralajmërojnë se ka pak ndërgjegjësim publik për rreziqet e tyre.
Mesatarisht, përdorimi i një stufe me gaz merr gati dy vjet nga jeta e një personi, sipas një studimi të familjeve në BE dhe Mbretëri të Bashkuar.
“Shkalla e problemit është shumë më e keqe nga sa mendonim”, ka thënë autorja kryesore Juana María Delgado-Saborit, e cila drejton laboratorin e kërkimit të shëndetit mjedisor në Universitetin Jaume I në Spanjë.
Studiuesit ia atribuuan stufave me gaz 36.031 vdekje të hershme çdo vit në BE dhe 3.928 të tjera në Mbretëri të Bashkuar. Studiuesit thonë se ata morën parasysh vetëm efektet shëndetësore të dioksidit të azotit (NO2), dhe jo gazrave të tjera, si monoksidi i karbonit dhe benzeni.
“Që në vitin 1978, për herë të parë mësuam se ndotja me NO2 është shumë herë më e madhe në kuzhinat që përdorin gaz sesa në ato që përdorin stufat elektrike”, ka thënë Delgado-Saborit.
Një në tri familje në BE gatuan me gaz, 54% e familjeve në Mbretërinë e Bashkuar dhe më shumë se 60% e tyre në Itali, Holandë, Rumani dhe Hungari. Stufat djegin gazin fosil dhe nxjerrin substanca të dëmshme që ndezin rrugët e frymëmarrjes.
Raporti, i cili u mbështet nga Fondacioni Evropian për Klimën, bazohet në hulumtimin e vitit të kaluar që mati cilësinë e ajrit në shtëpi, për të zbuluar se sa shumë e rriti ndotjen e ajrit në ambiente të brendshme gatimi me gaz. Kjo u mundësoi shkencëtarëve nga Universiteti Jaume I dhe Universiteti i Valencias të përcaktojnë raportet midis ndotjes së ajrit të brendshëm dhe të jashtëm gjatë gatimit me gaz.
Më pas ata aplikuan normat e rrezikut të sëmundjeve, të marra nga studimet mbi ndotjen e jashtme të NO2, për të përcaktuar numrin e jetëve të humbura.
Rezultatet janë në përputhje me një studim në SHBA në maj, i cili zbuloi se stufat me gaz dhe propan kontribuojnë deri në 19,000 vdekje të të rriturve çdo vit.
BE-ja shtrëngoi rregullat e saj për cilësinë e ajrit të jashtëm këtë muaj, por nuk ka vendosur standarde për cilësinë e ajrit të brendshëm. Aleanca Evropiane e Shëndetit Publik (EPHA) u ka kërkuar politikëbërësve të heqin gradualisht furrat me gaz duke vendosur kufizime në emetimet, duke ofruar para për të ndihmuar kalimin në stufa më të pastra dhe duke i detyruar prodhuesit të etiketojnë stufat me rreziqet e tyre të ndotjes./koha.net/
