Presidentja e Bankës Qendrore Evropiane, Christine Lagarde, njoftoi të hënën e 16 dhjetorit, se ajo planifikon të ulë më tej normat e interesit, pas lehtësimit që po vazhdon prej disa muajsh, përballë disinflacionit të avancuar dhe rritjes së rreziqeve për rritjen ekonomike.
“Nëse të dhënat që vijnë vazhdojnë të konfirmojnë skenarin tonë bazë”, i cili parashikon një kthim të inflacionit në objektivin prej 2 për qind në eurozonë deri në vitin 2025, atëherë “drejtimi është i qartë: ne planifikojmë të ulim më tej normat e interesit”, tha titullarja e institucionit gjatë një fjalimi në Vilnius, Lituani.
Ajo deklaroi më herët se politika monetare aktuale mbetet “kufizuese”, megjithëse BQE-ja uli normën e saj bazë të enjten e kaluar për herë të katërt që nga qershori, duke e çuar atë në 3 për qind.
Normat kryesore të BQE-së ndikojnë drejtpërdrejt në normat e huamarrjes të aplikuara nga bankat për kompanitë dhe familjet.
Duke i ulur gradualisht ato, instituti monetar mund të stimulojë rritjen, duke siguruar që kjo të mos ringjallë inflacionin.
Tregjet po parashikojnë disa ulje të normave nga BQE-ja në vitin 2025 për të sjellë normën bazë në rreth 2 për qind, një nivel i ashtuquajtur neutral që as penalizon dhe as nuk mbështet ekonominë.
BQE-ja mund të përballojë të marrë këtë rrugë, sepse mjedisi në eurozonë ka ndryshuar rrënjësisht që kur inflacioni arriti kulmin në mbi 10 për qind në vjeshtën e vitit 2022.
Dy vjet më vonë, shqetësimi është më shumë për “perspektivat e rritjes më të dobët se sa pritej dhe pasiguria e shtuar lidhur me ngjarjet gjeopolitike”, tha Christine Lagarde.
Prandaj, BQE-ja ka rregulluar komunikimin e saj: normat nuk kanë më nevojë të mbeten “mjaft kufizuese për aq kohë sa është e nevojshme”, një formulë e përdorur që nga viti 2022 në një kontekst të inflacionit të lartë dhe pasigurisë për trajektoren e saj të ardhshme.
Në takimin e saj të fundit të politikës monetare të vitit, të enjten e kaluar, BQE-ja hoqi termin “kufizues”.
E sigurt për një rikthim “të qëndrueshëm” të inflacionit brenda kufijve të mandatit të saj, ajo tani dëshiron të vendosë një politikë “të përshtatshme” për normat, bazuar në të dhënat ekonomike.
Është e mundur “kthimi në një situatë ku horizonti i politikës (monetare) mund të përshtatet sipas natyrës, madhësisë dhe qëndrueshmërisë së goditjeve si dhe nevojës”, përfundoi gardiania e parë e euros. /Le Figaro/Albanian Post/
