Zëvendëspresidenti i SHBA-së, JD Vance paralajmëroi të mërkurën, më 23 prill, se Moska dhe Kievi duhet të arrijnë një marrëveshje ose Uashingtoni do t’i japë fund përpjekjeve të tij për të arritur një armëpushim.
“Ne kemi lëshuar një propozim shumë të qartë si për rusët ashtu edhe për ukrainasit, dhe është koha që ata ose të thonë po, ose Shtetet e Bashkuara të largohen nga ky proces”, u tha Vance gazetarëve në Indi, ku ai është në një vizitë katër-ditore.
Vance foli ndërsa të dërguarit nga Uashingtoni, Kievi dhe vendet evropiane u mblodhën për bisedime në Londër në mes të një përpjekjeje të re të SHBA-së për t’i dhënë fund luftës së Rusisë në Ukrainë.
“Tani është koha, mendoj unë, për të ndërmarrë, nëse jo hapin përfundimtar, një nga hapat përfundimtarë,…”, shtoi Vance.
“Tani, sigurisht, kjo do të thotë se ukrainasit dhe rusët të dy do të duhet të heqin dorë nga një pjesë e territorit që zotërojnë aktualisht”, shtoi ai.
Presidenti amerikan Donald Trump premtoi gjatë fushatës se do të arrinte një marrëveshje midis Moskës dhe Kievit në 24 orë, por që atëherë nuk ka arritur të sigurojë lëshime nga presidenti Vladimir Putin.
Trump propozoi një armëpushim pa kushte në mars, parimi i të cilit u pranua nga Kievi, por u refuzua nga Putin.
Shtëpia e Bardhë përshëndeti një marrëveshje të veçantë nga të dyja palët për të ndaluar sulmet në infrastrukturën energjetike për 30 ditë, por Kremlini ka thënë se konsideron se moratoriumi ka skaduar. /Telegrafi/
