Negociatat e anëtarësimit të Shqipërisë në Bashkimin Evropian po ecin përpara, ndërsa së fundmi janë përcjellë në palën shqiptare letrat mbi rezultatet e procesit të shqyrtimit për dy grup-kapituj të rëndësishëm: Tregun e Brendshëm dhe Konkurrencën e Rritjen Gjithëpërfshirëse.
Një burim diplomatik polak ka bërë të ditur për Albanian Post se, për të hapur këto kapituj në Konferenca Ndërqeveritare, është e nevojshme që vendet anëtare të diskutojnë dhe të miratojnë me unanimitet Pozicionet e Përbashkëta të BE-së.
Këto pozicione do të pasqyrojnë nivelin e përafrimit të Shqipërisë me legjislacionin evropian në këto fusha dhe, gjithashtu, do të përcaktojnë kriteret e mbylljes për secilin kapitull negociues.
Procesi i anëtarësimit të Shqipërisë vijon të mbetet në fokusin e vendeve anëtare, ndërsa priten hapa të mëtejshëm në vijim të negociatave.
Ishte kryeministri Edi Rama që njoftoi se Shqipëria ka marrë dy letra të rëndësishme nga Presidenca Polake e Bashkimit Europian, duke i hapur dy grupe të reja të kapitujve në procesin e negociatave për anëtarësim.
Sipas Ramës, letra e parë është për çeljen e grupkapitullit 3 të negociatave, ndërsa e dyta, për grupkapitullin 2.
Ndërsa, shefi i diplomacisë polake, Radoslaw Sikorski gjatë raportimit në Komisionin e Jashtëm të Parlamentit Evropian, tha se “ne shpresojmë që të hapim një grup-kapitull të ri të negociatave me Shqipërinë në një konferencë ndërqeveritare që do të zhvillohet muajin e ardhshëm”.
Negociatat e anëtarësimit të Shqipërisë në BE kanë shënuar përparime të rëndësishme kohët e fundit.
Më 17 dhjetor 2024, gjatë Konferencës së Tretë Ndërqeveritare në Bruksel, u hap grup-kapitulli i gjashtë, i cili përfshin politikën e jashtme, të sigurisë dhe të mbrojtjes.
Kryeministri Edi Rama e vlerësoi këtë hap si një proces të lehtë për Shqipërinë, duke theksuar harmoninë e vendit me politikat e BE-së në këto fusha.
Kapitujt negociues ndahen në gjashtë grupime tematike: Bazat; Tregu i brendshëm; Konkurrueshmëria dhe rritja gjithëpërfshirëse; Agjenda e gjelbër dhe lidhje e qëndrueshme; Burimet, bujqësia dhe kohezioni; dhe marrëdhëniet e jashtme.
Grup-kapitujt
Takimi i dytë i Konferencës së Aderimit mes Bashkimit Evropian dhe Shqipërisë në nivel ministror u zhvillua të martën e 15 tetorit në Luksemburg, duke shënuar përparim në përpjekjen e saj të gjatë për t’u bashkuar me bllokun prej 27 vendesh.
Shqipëria hapi Klasterin 1, të përbërë nga pesë kapituj negociues, me Bashkimin Evropian në konferencën e saj të dytë ndërqeveritare.
Në këtë mënyrë, u bë vendi i tretë kandidat i Ballkanit Perëndimor, pas Malit të Zi dhe Serbisë, i cili hapi kapitujt e negociatave.
Shqipëria hapi zyrtarisht bisedimet e pranimit së bashku me Maqedoninë e Veriut në korrik të vitit 2022. /Albanianpost.com
