Pas vizitës në Kosovë dhe Serbi, Përfaqësuesi i Posaçëm i Bashkimit Evropian për dialogun Kosovë-Serbi, Peter Sorensen, do të takohet me Zëvendëssekretaren e Përgjithshme të NATO-s.
Zëvendëssekretarja e Përgjithshme e NATO-s, Radmila Shekerinska, do të takohet me Përfaqësuesin e Posaçëm të Bashkimit Evropian për dialogun, Peter Sorensen.
Lajmi është bërë i ditur përmes një komunikate për media, teksa nuk janë dhënë detaje se cilat do të jenë temat që do të diskutohen gjatë takimit.
Takimi në fjalë vije disa ditë pasi Sorensen përfundoi vizitën e tij të parë si emisar në Kosovë e Serbi.
Gjatë qëndrimit në Prishtinë, Sorensen takoi fillimisht presidenten e Kosovës, Vjosa Osmanin dhe më pas me kryeministrin në detyrë Albin Kurti.
Pas takimit me Kurtin, ndërmjetësi evropian tha për gazetarët se prioritet për të do të jetë të sigurojë takime mes përfaqësuesve të Kosovës dhe Serbisë. Sipas tij, janë vetë palët që pastaj do të vendosin për kompromise potenciale.
Ai e quajti takimin me Kurtin “fillim të mirë”.
“Ishte një takim prezantues, folëm për atë se si mund të vazhdojë procesi përpara. Është një fillim i mirë”, tha Sorensen.
Gjatë qëndrimit në Kosovë më 17 mars, Sorensen zhvilloi edhe takime me përfaqësuesit e partive opozitare./albanianpost/
