Rusia ka vënë në shënjestër Ukrainën me një valë tjetër sulmesh vdekjeprurëse, një ditë pas një prej sulmeve ajrore më të mëdha të luftës.
Të paktën dy persona u vranë në një sulm në një hotel në qytetin qendror të Kryvyi Rih dhe dy të tjerë vdiqën në një valë sulmesh me dron në rajonin Zaporizhzhia në juglindje, thanë zyrtarët.
Monitoruesit ukrainas kishin zbuluar më herët avionët rusë duke lëshuar raketa hipersonike dhe forcat ajrore thanë se kishin rrëzuar pesë raketa dhe 60 dronë.
Të paktën gjashtë persona vdiqën gjatë natës të së dielës deri të hënën dhe dhjetëra u plagosën pasi më shumë se gjysma e rajoneve të Ukrainës u sulmuan nga dronë dhe raketa .
Infrastruktura e energjisë elektrike u godit duke shkaktuar ndërprerje të energjisë në shumë qytete, ku u prekën edhe furnizimet me ujë.
Një deklaratë nga ministria ruse e mbrojtjes tha se armatime precize me rreze të gjatë dhe me bazë detare ishin përdorur për të goditur stacionet e energjisë dhe infrastrukturën përkatëse në të gjithë Ukrainën, duke përfshirë në Kiev, Lviv dhe rajonet Kharkiv dhe Odesa.
Presidenti i SHBA Joe Biden i quajti sulmet “të egër”, duke thënë se Uashingtoni do të vazhdojë të mbështesë rrjetin energjetik të Ukrainës.
Sekretari i Jashtëm i Mbretërisë së Bashkuar, David Lammy dënoi “sulmet frikacake të raketave dhe dronëve të Rusisë ndaj infrastrukturës civile”.
Në sulmet e fundit gjatë natës së së martës, Rusia tha se kishte lëshuar 10 raketa dhe 81 dronë.
Një hotel u godit nga një raketë balistike në Kryvyi Rih vonë të hënën, duke vrarë një burrë dhe një grua dhe duke lënë disa të tjerë të plagosur. Dy persona u raportuan të zhdukur.
Kryvyi Rih është qyteti i lindjes së Presidentit të Ukrainës Volodymyr Zelensky.
Ndërkohë, kreu i administratës rajonale të Zaporizhzhia, Ivan Fedorov tha se dy persona janë vrarë dhe katër të tjerë janë plagosur nga sulmet me dron.
Shpërthime janë raportuar gjithashtu në rajonet e Kievit, Sumy, Khmelnytsky dhe Mykolayiv.
Janë zbuluar lëshime të disa raketave balistike hipersonike Kinzhal (kamë), të cilat janë të vështira për t’u kapur nga mbrojtja ajrore./BBC/
