Ushtarët italianë të KFOR-it nga njësia inxhinierike e Komandës Rajonale Perëndim kanë realizuar një seri inspektimesh në disa ura në komunën e Pejës, Klinës dhe atë të Gjakovës.
Bëhet e ditur se aktiviteti në fjalë është pjesë e detyrave të njësive të xhenios për të mbështetur lëvizshmërinë në rajon. Njohja e gjendjes së infrastrukturës rrugore është thelbësore për suksesin e operacioneve në terren.
“KFOR-i vazhdon të zbatojë mandatin e tij, të bazuar në Rezolutën 1244 të Këshillit të Sigurimit të OKB-së të vitit 1999, duke kontribuar në krijimin e një mjedisi të sigurt dhe të qëndrueshëm për të gjithë qytetarët dhe komunitetet që jetojnë në Kosovë, si dhe garantimin e lirisë së lëvizjes”, thuhet në një njoftim në Facebook të kësaj force. /Klankosova.tv/
